- ఖలిస్తానీ మద్దతుదారులకు వార్నింగ్
ఒట్టావా: హింసను రెచ్చగొడ్తామంటే ఊరుకోబోమని కెనడా పబ్లిక్ సేప్టీ మినిస్టర్ డొమినిక్ లె బ్లాంక్ అన్నారు. ఖలిస్తానీ మద్దతుదారులకు ఆయన వార్నింగ్ ఇచ్చారు. భారత మాజీ ప్రధాని ఇందిరా గాంధీ హత్యకు సంబంధించిన పోస్టర్లను వాంకోవర్లో అతికించడంతో ఆయన స్పందించారు. శనివారం ఈ మేరకు ట్వీట్ చేశారు. ‘‘వాంకోవర్లో ఈ వారంలో మాజీ ప్రధాని ఇందిరా గాంధీ హత్యకు సంబంధించిన పోస్టర్లను అతికించినట్టు రిపోర్టులు వెలువడ్డాయి.
కెనడాలో హింసను రెచ్చగొడ్తామంటే ఊరుకోబోం” అని తెలిపారు. ఈ ఘటనపై భారత సంతతికి చెందిన చట్ట సభ్యుడు చంద్ర ఆర్య కూడా స్పందించారు. ‘‘ఇందిరా గాంధీ హత్యకు సంబంధించిన పోస్టర్లతో హిందూ–కెనడియన్లలో భయాన్ని కలిగించేందుకు వారు ప్రయత్నిస్తున్నారు. గురు పత్వంత్ సింగ్కు చెందిన వేర్పాటు సంస్థ సిఖ్ ఫర్ జస్టిస్.. హిందువులను భారత్కు వెళ్లిపోమని కొన్ని నెలల క్రితం వారిపై దాడి చేసింది.
ఈ ఘటన దానికి కొనసాగింపు కిందకే వస్తుంది. ఆ పోస్టర్లలో ఇందిరా గాంధీ నుదుటిపై ఉన్న బొట్టుని బట్టి కెనడాలోని హిందువులను వారు లక్ష్యంగా చేసుకున్నారని తెలుస్తోంది. లా ఎన్ ఫోర్స్ మెంట్ ఏజెన్సీలు ఈ ఘటనపై వెంటనే చర్యలు తీసుకోవాలి”అని డిమాండ్ చేశారు.
